Tħallsu miljun Ewro għal overtime ‘tas-soltu’ kif ukoll allowances fit-taqsima ta’ jobs fantażma, il-ministeru t’Għawdex

This article is available in English

Minn investigazzjoni li saret mill-Uffiċċju tal-Awditur Ġenerali (l-NAO), instab li d-Diviżjoni tal-Istrateġija u s-Support tal-Ministeru t’Għawdex, ħallset kważi miljun Ewro għall-overtime u għal allowances oħra fl-2021 għal talbiet li kienu “vagi” u “tas-soltu”.

Din id-Diviżjoni jaħdmu magħha kważi tmin mitt ħaddiem, inklużi dawk li jimpjega l-ministeru għat-tindif pubbliku u l-maintenance. Ir-raġunijiet li kienu qed jingħataw għal dan l-overtime, l-NAO sab li kienu “ġeneriċi, u jnisslu dubju dan l-overtime kollu kienx ġustifikabbli; jagħti wkoll l-impressjoni li dan ix-xogħol extra mal-Ministeru t’Għawdex possibbilment kien qed jitqies bħala estensjoni tas-salarju bażiku tal-individwi kkonċernati.”

Fl-2021, għall-impjegati tad-diviżjoni,  intefqu b’kollox 956,120 Ewro bejn overtime u allowances. Din id-diviżjoni għandha 35 dipartiment u taqsima li jinkludu d-Direttorat tal-Maintenance u r-Restawr, it-taqsima tal-Kostruzzjoni u l-Maintenance, it-taqsima tat-Tindif Pubbliku kif ukoll it-Taqsima tat-Toroq. Din is-somma tiġi 53% tal-budget kollu tal-ministeru għall-overtime u l-allowances l-oħra.

Il-jobs fid-dipartimenti tal-maintenance u t-tindif fil-Ministeru għal Għawdex huma magħrufa sew bħala ċentru għall-jobs fantażma mogħtija bħala rigal għall-vot, u xogħol ftit li xejn isir bis-saħħa tagħhom.

U issa l-Awditur Ġenerali sab li “l-overtime kien sar drawwa, ħafna drabi kien ikun ġustifikat b’mod vag” u b’nuqqas totali ta’ kontroll.

L-attendance sheets biex jiġġustifikaw it-talbiet għall-overtime sab li kienu għal kollox “mhux ta’ min wieħed joqgħod fuqhom”. U qal ukoll li “ma jistax jgħid b’ċertezza jekk l-uffiċjali li investiga bħala kampjun tħallsux kif suppost għall-overtime li qalu li għamlu”.

Lill-ministeru, ħeġġu biex jara jekk “dan l-overtime kontinwu kienx riżultat ta’ xogħol li ma kienx qed isir kif suppost fil-ħin normali tal-uffiċċju, u allura kellu jieħu azzjoni skont kif ikun hemm bżonn”. L-NAO rrakkomanda li mil-lum ‘il quddiem, l-overtime, il-ministeru kellu  jikkontrollah bis-sħiħ. Dan l-overtime kellu jingħata biss f’ċirkostanzi eċċeżżjonali, u kemm jista’ jkun, f’xogħlijiet ad hoc b’miri speċifiċi li kellhom jintleħqu”.

Fejn l-overtime jitqies ħaġa ta’ rutina, il-ministeru kellu “jerġa’ jeżamina l-prattiċi tax-xogħol, u jsib alternattivi effiċenti li fl-istess ħin ikunu jaqblu iżjed ekonomikament”.

L-NAO qal li għalhekk wieħed għandu jifli jekk l-impjegati għandhomx jintbagħtu jaħdmu f’dipartimenti oħra skont il-ħtieġa tal-mument; u għandu jitqies ukoll ikunx aħjar li jinbidel il-ħin tax-xogħol biex ma jsirx abbuż fl-għoti tal-overtime.

Lill-ministeru, l-NAO irrakkomandalu li minn issa ‘l quddiem l-uffiċjali kollha, l-attendenza tagħhom iniżżluha kuljum, kif jgħid il-Public Service Management Code (il-PSMC).

“Id-dettalji kollha għandhom ikunu ċari u jinqraw sew. Dan it-tagħrif, speċjalment fejn jidħol l-overtime, għandu jiġi mifli sew u l-uffiċjal responsabbli għandu jiċċertifika li huwa korrett. Dan għandu jsir indipendentement mill-uffiċjali li jiffirmaw dan l-istess reġistru. Għandha tittieħed l-azzjoni kontra dawk l-uffiċjali li qed jippruvaw jabbużaw mis-sistema.”

L-ebda informazzjoni dwar it-815,000 Ewro li ntefqu f’allowances

L-Awditur Ġenerali ma setax jistabbilixxi għal xiex tħallsu t-815,000 Ewro f’allowances jew fejn spiċċaw.

Dwar dawn it-talbiet li kienu diġà vagi, l-NAO ma seta’ jagħmel ebda verifika għax “id-dokumentazzjoni neċessarja ma ngħatatlux biex ikun jista’ jifliha…minkejja d-diversi reminders li ntbagħtu”.

Lanqas ma ngħatalu tagħrif biżżejjed dwar ir-rati u l-ħlasijiet tal-overtime. Fl-istess ħin, xi uffiċjali fil-kampjun li eżamina l-NAO “għamlu xogħol b’overtime li ma kienx jitqies parti mir-responsabbiltajiet normali tagħhom, u ma kellux x’jaqsam mad-deskrizzjoni ta’ xogħlhom”.

Fost dawn kien hemm fotografu mad-Direttorat tal-Wirt Kulturali li għamel overtime bħala Head Beach Supervisor; kien hemm ukoll Assistant Foreman u Technical Officer fit-Taqsima tat-Tindif Pubbliku li għamlu xogħol ieħor fil-Biċċerija u bħala Beach Inspector.

F’dawn il-każijiet kollha, l-NAO sab li dawn l-uffiċjali tħallsu l-overtime skont ir-rata ta’ kuljum għal kull siegħa li jaħdmu. B’dan kollu l-awdituri ma setgħux jistabbilixxu jekk dik ir-rata kinitx korretta, jew kellhiex tintuża rata iktar baxxa skont dak li jistabbilixxi l-PSMC: dan ma setgħux jagħmluh “għax waqt li kien qed isir il-proċess tal-awditjar, it-tagħrif li ntalab dwar l-iskala applikabbli tas-salarju ma ngħatax”.

L-NAO għamel ir-rakkomandazzjoni ovvja biex il-ministeru jiżgura “li jekk l-overtime verament ikun hemm bżonnu, l-uffiċjali involuti għandhom jitħallsu skont ir-rata korretta, u kull pagament għandu jsir skont il-kalkoli applikabbli biex tibqa’ traċċa tiegħu għall-iskop tal-awditjar”.