Is-Segretarja Parlamentari għall-Ugwaljanza siekta dwar ir-ritorn ta’ Axisa

Read in English.

Rebecca Buttigieg, is-segretarja parlamentari għar-riformi u l-ugwaljanza, ma weġbitx il-mistoqsijiet ta’ The Shift dwar jekk ġietx ikkonsultata fuq id-deċiżjoni tal-gvern li jdaħħal lura għax-xogħol lil Clint Axisa, uffiċjal għoli fi Transport Malta li għaddej bi proċeduri kriminali fil-qorti, akkużat b’fastidju sesswali.

Il-ġimgħa l-oħra, The Shift żvela li Clint Axisa, uffiċjal għoli ta’ Transport Malta li fl-2022 tressaq il-qorti talli allegatament iffastidja lil żewġ impjegati nisa, għadha kif tneħħietlu s-sospensjoni tiegħu mix-xogħol b’ordni mill-Uffiċċju tal-Prim Ministru.

Fi Frar tal-2022, Axisa ġie akkużat b’serje ta’ reati, fosthom li wettaq atti sesswali mingħajr il-kunsens ma’ kollega mara u li ffastidja sesswalment lil kollega oħra, filwaqt li ssoġġettahom għal aġir b’konnotazzjonijiet sesswali u wettaq reati li suppost bħala uffiċjal pubbliku kellu jevita milli jsiru.

Waqt il-proċedimenti attwali, il-pulizija ddikjaraw li Axisa saħansitra offra l-flus lill-vittmi tiegħu biex jirtiraw ir-rapporti tagħhom kontrih.

Minbarra lill-parlamentari, The Shift ikkuntattja wkoll lil Reneè Laiviera, il-President tal-NCPE, li dan l-aħħar nediet il-kampanja “Beat the Silence” biex tħeġġeġ lin-nisa jirrappurtaw il-fastidju li jġarrbu fuq il-lant tax-xogħol. Madankollu, Laiviera ma weġbitx il-mistoqsijiet tagħna.

Lanqas il-President tal-Partit Laburista Ramona Attard ma wieġbet il-mistoqsijiet ta’ The Shift.

U lanqas il-lobby groups il-Malta Women’s Lobby u l-Women’s Rights Foundation ma wieġbu l-mistoqsijiet tagħna dwar din il-kwistjoni.

Sal-lum, l-unika reazzjonijiet li saru kontra r-ritorn ta’ Axisa fuq il-lant tax-xogħol kienu tal-kandidat indipendenti għall-elezzjonijiet Ewropej Arnold Cassola, tal-Partit Nazzjonalista u tal-ADPD.

Fi tliet stqarrijiet separati, il-gvern ta’ Robert Abela ġie kkritikat għal din id-deċiżjoni tiegħu, li għal ħafna hi meqjusa daqqa ta’ ħarta f’wiċċ in-nisa kollha li ġarrbu xi forma ta’ fastidju sesswali fuq il-post tax-xogħol.

Il-PN ikkundanna din il-mossa u qal li l-prim ministru kien qed jibgħat messaġġ li “l-fastidju sesswali mhux biss skużabbli iżd’anki aċċettabbli. Qed jibgħat messaġġ lil dawk li rnexxielhom jirbħu l-abbuż li għandhom jisktu u ma jirrappurtawhx għax min iwettaq dan l-abbuż jista’ jkollu l-barka u l-protezzjoni tal-gvern.”

Fi kliem l-ADPD, “Allegat aggressur li għaddejjin proċeduri kriminali kontrih, jidher li kapaċi juża t-tessera tiegħu mal-partit biex jikseb ‘get out of jail free card’”.

Skont ir-regoli stabbiliti, il-ħaddiema taċ-ċivil li jkollhom akkużi kriminali kontrihom, għandhom jiġu sospiżi minnufih mid-doveri tagħhom u jitqiegħdu fuq nofs salarju sakemm jintemmu l-proċeduri kontrihom fil-qrati. Madankollu, l-Uffiċċju tal-Prim Ministru xorta waħda ppermetta li Axisa jerġa’ jingħata postu mal-gvern.

It-tneħħija tas-sospensjoni ta’ Axisa u li ddaħħal lura għax-xogħol huma l-aħħar każijiet fost bosta każijiet simili oħrajn li ġraw tul l-aħħar ġimgħat, hekk kif sal-lum diġà ddaħħlu lura mill-anqas 36 impjegat(a) taċ-ċivil fuq il-post tax-xogħol, minkejja li hemm għaddejjin proċeduri kriminali kontrihom.

M’għand sorsi mill-ministeru tal-intern, The Shift hu infurmat li l-prim ministru injora għalkollox lis-segretarja parlamentati u lill-Kummissjoni Nazzjonali għall-Promozzjoni tal-Ugwaljanza (l-NCPE) meta ddeċieda li jdaħħal lura lil Axisa.

Intant, Axisa qed jiċħad kull akkuża kontrih.