Il-linja nazzjonali l-ġdida ffriżat il-pagi għal erba’ snin

Read in English.

L-impjegati kollha tal-KM Malta Airlines, inkluż il-piloti u l-membri tal-ekwipaġġ li kienu mal-Air Malta, mhu se jkollhom l-ebda żieda fis-salarju bażiku tagħhom mill-anqas għall-erba’ snin li ġejjin.

Minn kuntratti li ġew f’idejn The Shift jidher li, minbarra li se jwettaq iffriżar obbligatorju tal-pagi (li se jiġu aġġustati biss biż-żidiet għall-għoli tal-ħajja), il-gvern biddel mill-qiegħ il-kundizzjonijiet tal-impjegati kollha ta’ din il-linja tal-ajru li issa ħadet post l-Air Malta. Dawn il-kundizzjonijiet il-ġodda jixbhu lil dawk tal-linji tal-ajru low-cost bħar-Ryanair u l-easyJet.

Għalhekk l-impjegati tal-KM Malta issa mistennija jaħdmu sigħat itwal u jdaħħlu inqas fil-but minn meta kienu jagħmlu l-istess xogħol mal-Air Malta. Skont il-kuntratti l-ġodda, l-impjegati tal-linja tal-ajru “l-ġdida” se jkollhom is-salarju bażiku tagħhom fiss għat-48 xahar li ġejjin – sa April 2028 – u mhux se jkunu jistgħu jieħdu salarju bażiku akbar, anki jekk il-union tagħhom tinnegozja xi ftehim kollettiv ġdid.

Fil-frattemp, il-KM Malta Airlines, kumpanija kollha kemm hi tal-gvern, għadha ma rrikonoxxiet lill-ebda union li kienet tirrappreżenta lill-impjegati tal-Air Malta, filwaqt li s’issa ma sar l-ebda ftehim kollettiv.

Saru bidliet sinifikanti wkoll fin-numru tal-iskali tas-salarju tal-impjegati kollha, u għalhekk saret iżjed diffiċli u itwal biex l-impjegati jimxu minn skala għall-oħra. Barra minn hekk tneħħew ħafna mill-benefiċċji li kellhom l-impjegati tal-Air Malta, fosthom l-iskemi tal-irtirar, il-bonuses tas-servizz, il-liv addizzjonali skont is-snin tas-servizz, u ġarr tas-sickleave.

Il-linja tal-ajru l-ġdida neħħiet ukoll il-faċilitajiet kollha tat-trasport li l-Air Malta kienet tipprovdi lill-piloti u lill-ekwipaġġ. Għalhekk, il-piloti, l-ekwipaġġ u l-ħaddiema l-oħra tal-linja tal-arju issa jeħtieġ imorru għax-xogħol bit-trasport tagħhom, irrispettivament mill-ħin tat-titjira. Madankollu, il-linja tal-ajru l-ġdida tipprovdi faċilitajiet tal-parkeġġ bla ħlas għall-ekwipaġġ.

Bidla oħra saret fil-kummissjonijiet tal-kru, li issa għandhom limitu sa 10% biss, ferm inqas minn dak li kellhom mal-Air Malta, filwaqt li din il-kummissjoni se tiġi kkalkulata skont kemm l-ekwipaġġ jirnexxilu jbigħ ikel u xorb abbord it-titjiriet tal-KM Malta.

Xi impjegati tal-KM Malta li tkellmu ma’ The Shift fil-kunfidenzjal ilmentaw fuq kif qed jiġu ttrattati mill-gvern iżda qablu li l-Air Malta ma kellhiex futur. Qalu li issa qed ikollhom iħallsu prezz qares għas-snin twal ta’ tmexxija ħażina li kien hemm matul is-snin, filwaqt li wħud mid-diriġenti, fosthom iċ-Chairman David Curmi, baqgħu f’posthom.

L-impjegati qasmu ma’ The Shift ukoll id-diżappunt tagħhom għall-mod kif aġixxew il-unions tagħhom, b’mod partikolari l-General Workers Union, u li fi kliemhom ħassewhom ġew “mibjugħa” u “ttraduti”.

L-Air Malta sfaxxat fl-aħħar ta’ Marzu li għadda wara bosta snin ta’ telf kbir fil-finanzi. Permezz tal-Ministru tal-Finanzi Clyde Caruana u ċ-Chairman David Curmi, il-gvern kien ipprova jikseb pakkett ġdid ta’ għajnuna mill-Istat għall-Air Malta; madankollu l-Kummissjoni Ewropea ma kinitx laqgħet il-proposta tagħhom.

Hu stmat li l-bidla kożmetika mill-Air Malta għall-KM Malta Airlines diġà swiet lill-poplu madwar €300 miljun, iżda l-gvern għadu sal-lum ma jridx jiżvela kemm swiet.