Il-Park tan-negozji f’Għawdex inbidel f’maħżen għal Joseph Portelli

Il-ftehim orġinali kien sar bejn il-gvern u l-kumpanija Ta’ Maggi Industrial Parks Gozo, u kien maħsub biex jinbnew 76 garaxx ħalli jinkrew lil negozji mill-industrija tal-manifattura.

Madankollu, minn investigazzjonijiet li wettaq The Shift jidher li dawn qed jintużaw bħala mħażen mill-kuntrattur Portelli, bi ksur tal-kundizzjonijiet tal-ftehim stabbiliti minn INDIS Malta, l-entità governattiva responsabbli.

Mhux hekk biss, iżda The Shift skopra wkoll li d-direttur u s-segretarju tal-kumpanija ta’ Ta’ Maggi waqt il-ftehim inizjali, Francis Gauci, m’għadux jokkupa dawk il-karigi u minfloku hemm Maria Agius, oħt Mark Agius, wieħed mis-sħab kummerċjali ta’ Portelli magħruf bħala Ta’ Dirjanu.

Ftehim dubjuż mill-bidu nett

Il-ftehim bejn il-gvern u Ta’ Maggi kien sar fl-2014, ftit wara li l-Labour ħa l-poter f’idejh. Dan kien ġie ffaċilitat mill-eks ministru Chris Cardona li dak iż-żmien kien responsabbli mill-Malta Industrial Parks (MIP), aġenzija li mbagħad saret INDIS Malta.

Skont dan il-ftehim bla preċedent, l-MIP, mingħajr ma kienet ħarġet sejħa għall-offerti, qabdet u tat din il-biċċa art b’direct order lil Gauci b’konċessjoni ta’ 65 sena, li tista’ tiġġedded għal 99 sena.

Skont il-kundizzjonijiet tal-konċessjoni, Gauci kien obbligat ilesti l-proġett u jikri l-garaxxijiet b’kirja fit-tul lil negozji żgħar bħal mekkaniks, sprejers tal-karozzi, ħaddieda u artiġġjanati oħra.

Iżda ftit wara li ġiet iffirmata l-konċessjoni, Gauci, permezz tal-kumpanija tiegħu Ta’ Maggi Industrial Park Gozo Ltd, għamel arranġament informali ma’ Portelli biex jittrasferixxi t-twettiq tal-proġett lilu.

Meta mistoqsi, Gauci ammetta li sar dan it-“trasferiment ta’ tmexxija” iżda ma riedx jgħid jekk dan il-ftehim privat baxx baxx dwar proprjetà tal-gvern jinvolvix ukoll xi ħlasijiet.

Filwaqt li Maria Agius issa ħadet il-kariga tat-tmexxija li kellu Gauci, Gauci u negozjant ieħor b’rabtiet mal-Partit Laburista Kenneth Abela xorta għadhom jidhru bħala azzjonisti.

Skont il-konċessjoni, Gauci u Abela ma jistgħux jittrasferixxu s-sjieda tal-konċessjoni lil xi ħadd ieħor mingħajr il-kunsens bil-miktub ta’ INDIS Malta. Barra minn hekk, skont il-konċessjoni, kull negozju li jikri garaxx fiż-żona industrijali kien jeħtieġ l-approvazzjoni ta’ INDIS Malta biex ikun żgurat li l-proġett ikun jissodisfa l-għan inizjali tiegħu.

Madankollu, sorsi f’INDIS Malta li tkellmu ma’ The Shift qalulna li sal-lum l-ebda SME mhi qed topera minn dawk il-garaxxijiet maħsuba għall-manifattura. Minflok, Portelli u Mark Agius, sieħbu fin-negozju, biddlu s-sular t’isfel tal-park fi mħażen privati biex prinċipalment jerfgħu l-materjal tal-kostruzzjoni fil-garaxxijiet u jużaw il-“park” bħala kwartieri għall-ħaddiema tagħhom.

Anki wħud mill-garaxxijiet fis-sular ta’ fuq qed jintużaw bħala mħażen minn persuni u negozji privati b’rabtiet ma’ Portelli u Agius.

Sal-lum, INDIS Malta għadha ma ħadet l-ebda azzjoni kontra s-sid oriġinali tal-konċessjoni minkejja l-fatt li qed jinkisru l-kundizzjonijiet tal-ftehim oriġinali.

Portelli u Agius mhumiex azzjonisti tal-kumpanija li oriġinarjament kienet ingħatat il-konċessjoni. U l-konċessjonarju oriġinali Francis Gauci issa m’għadux fil-bord tad-diretturi u segretarju tal-kumpanija.

Minflok, f’Lulju li għadda, Maria Agius, oħt Mark, saret id-direttur uniku ta’ Ta’ Maggi Industrial Park Gozo Ltd.

Agius ta’ 31 sena hi wkoll direttur ta’ bosta entitajiet kummerċjali li jinvolvu lil ħuha, Mark Agius u Daniel Refalo, soċju ieħor qrib il-kuntrattur Portelli fi proġetti tal-kostruzzjoni madwar Malta u Għawdex.

Hi direttur ta’ Agius Trading Limited, Ben Hotels Ltd, Bend Holdings Ltd, Excel MJD Limited, Joseph Agius & Sons (Gozo) Ltd, Magus Ltd u MMJ Leasing International Ltd. Hi wkoll azzjonista u segretarja ta’ bosta kumpaniji oħrajn.