Pass eqreb biex xi żviluppaturi jbiddlu palazz tas-seklu 18 f’lukanda

Read in English.

Tliet żviluppaturi li qed jippruvaw ibiddlu palazz storiku tas-seklu 18 f’Ħaż-Żebbuġ f’lukanda boutique lussuża, irnexxielhom jimxu pass ‘il quddiem fl-implimentazzjoni tal-proġett wara li kemm is-Sovrattendenza tal-Wirt Kulturali (l-SCH) u anki l-Awtorità tal-Ambjent u r-Riżorsi (l-ERA), it-tnejn irtiraw l-oppożizzjoni tagħhom.

Fl-istess waqt, l-Awtorità Maltija tat-Turiżmu, li bħalissa qed issirilha bosta pressjoni mill-partijiet ikkonċernati fl-industrija biex trażżan it-tfaqqis ta’ aktar lukandi madwar il-pajjiż minħabba saturazzjoni qawwija fis-suq, għadha kif ħarġet ċertifikat tal-konformità lill-iżviluppaturi biex ikunu jistgħu jissoktaw bil-pjanijiet tagħhom.

Mijiet ta’ residenti ġirien u bosta NGOs oġġezzjonaw għall-iżvilupp ta’ Villa Buleben biex issir lukanda u argumentaw li dan il-proġett kien se jirrovina lil din il-binja storika.

Oriġinarjament, l-iżviluppaturi ppjanaw li jibnu estensjoni massiva mal-palazz, biex issir lukanda ta’ 50 kamra. Madanakollu, maż-żmien biddlu l-pjanijiet tagħhom u naqqsu n-numru tal-kmamar tas-sodda għal 32.

Wara bosta oġġezzjonijiet min-naħa tal-għassies tal-patrimonju, saru wkoll xi bidliet oħrajn, fosthom it-tneħħija xi decking mill-masġar tal-ġnien, il-bini ta’ struttura tal-ħġieġ, u t-tneħħija tal-mezzanin tas-sala nobbli tal-palazz.

Madanakollu, minn korrispondenza fuq il-website tal-Awtorità tal-Ippjanar jidher li s-Sovrattendenza trid twettaq stħarriġ aktar fil-fond tat-13-il kabina li l-iżviluppaturi qed jipproponu li jibnu fil-ġnien, u mistennija tagħmel ukoll għadd ta’ diskussjonijiet mal-perit tal-proġett, Edwin Mintoff.

Meta nbena dan “il-Palazz tal-Baruni”, kif inhu magħruf f’Ħaż-Żebbuġ, kien ir-residenza tal-Baruni Geatano Azzopardi, professjonista fil-mediċina li kien jaħdem fl-infermerija tal-Ordni tal-Kavallieri ta’ San Ġwann.

Sa ftit snin ilu, il-villa kienet proprjetà ta’ Alfred u Joseph Manduca, li anki huma kienu applikaw biex ibiddlu partijiet minnha fi flettsijiet.

Fl-2018, imbagħad, il-palazz xtrawh l-ispekulaturi tal-proprjetà Neville Agius u Reuben Magro, flimkien man-natur Andre Farrugia minn Farrugia & Farrugia Notaries ta’ San Ġwann.

Dawn it-tliet negozjanti huma sidien b’ishma ugwali ta’ Buleben Estates Ltd., il-kumpanija wara dan l-iżvilupp.

Ħafna mill-oġġezzjonijiet li saru għal dan l-iżvilupp talbu lill-Awtorità tal-Ippjanar biex twaqqaf il-kummerċjalizzazzjoni tal-palazz skedat, u insistew li dan il-proġett ikun ta’ detriment għall-wirt Żebbuġi.

Min-naħa l-oħra, l-iżviluppaturi qed jinsistu li l-palazz jeħtieġ dan l-investiment biex ikun jista’ jsirlu r-restawr meħtieġ, inkella kien se jispiċċa jaqa’ biċċiet.